Hnamdang sumdawng lakah CYMA hmalakna MIMA tha an ti
May 16, 2023
Aizawl May 16, 2023 : Mizoram Merchant Association (MIMA) chuan an mangan laia Central YMA in dan loa sumdawngte dap chhuaka sumdawnna ti tawp tura hma an la chu Mizoram leh hnam hmangaihna a ni, tiin, lawmawm an tih thu an sawi.
MIMA chuan, "Kan ram neihchhun, Mizoram ah hian dan loa hnamdang sumdawng an tam ta hle mai. Heng sumdawngte hian mizo min la dip ral thuai dawn niin kan hria a. Kan mang a ang hle thin a ni. State dangte kan en hian economic assimilation hi kan hlat lo hleah kan ngai a ni," an ti.
CYMA-in Mizo hming hawha hnamdang sumdawngte leh Mizo, sumdawnna atana hnam dangte hnena an hming hawhtirtute chu April 10 atanga chhiara ni 30 chhung hun a pe a ni. Hemi chungchangah hian MIMA chuan, "He an hun tiam ral hnu pawha CYMA thu pawh zawm duh loa luhlul la chhuah tlattute hi MIMA General headquarters chuan a dem takzet a ni. Chumai bakah, mizo, sumdawnna atana an hming hawhtirtute hi hnam hralhtute an ni tih in hria a, hetiang sumdawnna hi ti tawh lo turin kan ngen a ni," an ti.
Central YMA hmalakna chu MIMA chuan an thlawp thu leh a tul ang zela hma an lakna kawngah an theih tawkin an thlawp zel tur thu an sawi bawk.
Hetihlai hian Central YMA President R. Lalngheta chuan Aizawl khawpui chhunga dan lo anga sumdawngte inchingfel tura an ngen hun a zo a, tunkar chhoah hian Branch hrang hrangin an huam chhunga sumdawngte an endik ang a, chumi hnuah chuan dan zawm lote chu an dawr kharsak an ni ang a ti.
Credit:Zalen
Comments
Post a Comment