KNU Brigade 3 huam chhunga school, Biak in telin In 40 chuang Military council sipaiten an hal

KNU Brigade 3 huam chhunga school, Biak in telin In 40 chuang Military council sipaiten an hal

11th May 2023

Karen National Union (KNU) Brigade 3 huam chhung Khle Lui Thong District, Ledo township-ah Military council sipaiten zirna school, Biak in telin chenna in 40 chuang an hal chhiat thu KNU Central-ten an thuchhuahah an tar lang a.

May 9 zing dar 5:30 vel khan KNU Brigade 3 huam chhungah Military council sipaiten Pu Lu Nu Phu khuaah In 2 leh Le Yaing Gyi khawpum in 42, school 1, Baptist Biak in 1, Preschool leh Kudam telin an hal chhiat nual thu hriat a ni a.

Hetiang vek hian May 4 pawh khan KNU-Mu township, Yan Myo Aung khaw, Military council sipaiten ralthuam liana a beih hnuah In 18 an hal chhiat thu KNU Central-ten an thuchhuahah an tar lang a.

Chenna In an halna hnuhma te seng hawi turin In neitute kal an tum thin a, Military council sipaiten khawchhungah an awm chilh tlat avangin khawchhung an lut ngam lova, an bungrua neih zawng zawng te a kan chhiat vek thu hriat a ni bawk.

Military council sipaiten chenna in an hal vang te, ralthuam lian an kah chiam avang te leh mipuite mana an sawisak thin avangin KNU, Ledo township, Le Yaing Gyi khua, Pu Lu Nu Phu khuaa tualchhung mipui 1206, KNU-Mu township Yang Myo Aung khuaa mi 1020 te kum 2022 June 25 atang khan khawchhung chhuahsanin an la haw ngam rih loh thu hriat a ni bawk.

Credit: The Tahan Post