Manipur State aţangin sa himna zawng raltlan 5,822 Mizoram an rawn lut tawh

Manipur State aţangin sa himna zawng raltlan 5,822 Mizoram an rawn lut tawh

15th May 2023

All India Radio News Aizawlin a tar lan angin India, Manipur State-a nasa taka tharum thawhna a thlen avangin May 14 tlai dar 5 thleng khan Manipur aţangin sa himna zawng raltlan mi 5,822-in Mizoram an rawn lut tawh thu hriat a ni a.

Raltlante hi Aizawl district-ah mi 2,021 awmin an tam ber a. Kolasib district-ah mi 1, 847 leh Saitual district-ah mi 1,790 an awm bawk a. Champhai district-ah hian mi 135 an awm a, Khawzawl district-ah mi 15 awmin Serchhip district-ah mi 14 an awm bawk a ni. 

Khawzawl leh Serchhip district-ah luh belh an awm lova. Raltlan tamna ber ni thin Saitual district chu Aizawl district leh Kolasib district-in May 14 khan a rawn khum ta a ni. Raltlante hi nunau, naupang, nausen nu pawm lai, hmeichhia leh upa lam an ni deuh ber a. Manipur State Churachandpur district-a an in halsak a nih avang te, tharum thawhna a nasat em avanga sa himna zawnga lo tlanchhiate an nih thu hriat a ni bawk.

Manipur Sorkara Security Adviser Kuldeep Singh-a chuan Manipur-a buaina avanga thi zat hi mi 72 an nih thu a sawi a. Mipui 26,300 chu hmun hrang hranga Relief camp 178-ah an awm thu leh Manipur-a buaina chhuakah hian in 1,800 chuang hal chhiat a nih tawh thu a sawi bawk a ni.

Credit: The Tahan Post