MANIPUR TUALCHHUNG BUAINA INTANNA KANGVAI KHAW DAIAH "WELCOME TO GREATER MIZORAM" TIH A INTAR TA KULH MAI LE!

MANIPUR TUALCHHUNG BUAINA INTANNA KANGVAI KHAW DAIAH "WELCOME TO GREATER MIZORAM" TIH A INTAR TA KULH MAI LE!

11.5.2023 : Nimin khan Churachanpur lama MZP hruaitute chuan Manipur tualchhung buaina rawn chhuah tanna (epicenter) Leisang Anglo-Kuki War Centenary Gate Meitei hoin an hal chhiat tak atanga Manipur ram lam KM 1 vel, Kangvai khua-a Tlang mi duty te tlawhin buhfai leh mamawh dangte an pe a, kan unau tlangmite chuan gate siamin "Welome to Greater Mizoram" tih an lo tar kuau mai a, an rilru a khawih zia zirlai hruaitute chuan an sawi. Zirlai hruaituin sms hmanga thu min rawn thawn hi a chhiar nawm zawk nan tlem chulmamin ka rawn chhuah chhawng e - Vanneihthanga

Vawiin 10.5.2023 tlai dar 4:30 vel khan, kan tlangval ten buhfai leh tui an mamawh ang tiin frontline Kangvaiah kan President hoin kan chhuk thla a, kan thian te, frontline hmun hriate kaihruaina hnuaiah kan tlan liam ve ta tawp a. Kan rilruah "Meitei hel sniper ten min lo ral sai mai ang" ti hlau chung chuan kan tlan thla ta zel a. kalkawngpui (highway) zawh ngam lovin highway atangin kawng te zawk zawhin kan kal ta vang vang a. Raltlan leh mahni in leh lo chhuahsante an theih ang angin an lo inthiar sap sap hlawm a. Chutih mek lai chuan khaw chhunga kan mi tlangval leh pa te chuan gate lo siamin, an silai neih ang angte nen chuan an lo duty ve bawk a. 

Outpost hmasa ber kan thlen chuan kan (tlangmi sipai) tlangvalte chu inral ring tawk takin an Ak te leh M4 te chu an hûm far a, buhfai leh tui kan han thlak thla chu an lawm kher mai. An hotupa nupui chu Mizo ngei lo niin theituite min han chhawp sak a, tlangval rualin silai tha tak tak an hûm far han hmuh chuan, thla a muang ngei mai! Kan theitui te kan in zawh hnu chuan, outpost dang panin kan chhuak leh ta a. Outpost dang kan thlen chuan tlangval rualin kan motor an han hmu chu an lo in ralring khawp mai a! Kan tlan lut ta a, minlo hmuaktu chu tu dang ni lovin an khuaa revival speaker thin a lo ni a. A mual pawng lai tak mai chu Biak In angreng, tawngtaina hmun leh camping-na hmun atan an hman thin thu min lo hrilh mawlh mawlh bawk a. "Ka indaih lo khawp mai, silai mu zawn ngai nen, a hmingin speaker ka ni bawk sia, silai mu ngaihtuah bakah tlangvalte ka kilkawi a ngai bawk si a" tiin min lo hrilh mawlh mawlh a. Hun a liam chak si a, tlai thimin min nang palh ang tiin kan pek turte chu kan pe ta sawk sawk a. 

Kuki hnam sipai leh ZRA te hmun khatah ral do tlanga an awm kan han hmu chu thla a muangin rilru a hlim kher mai! Tunhma a inmil ngai miah lo kha tunah chuan ral an do tlang ta a ni! Pathian remruat dan hi a mak a ni! Chutah kan buhfai te kan lak thlak hnu chuan kan hnam sipai pakhat hian min lo kova, kava kala a thil min lo en tir chuan rilru a khoih ngang mai! Kangvai Welcome Gate-ah chuan "Welcome To Greater Mizoram" tih an lo tar vang mai a. Unau thisen zawm, inthen thei kan nih loh ziate kan han sawi mawlh mawlh a. Ka rilruah chuan eng dang a lang thei lo. "Greater Mizoram kan tih thin chu a hlawhtling thei ngei dawn a nih hi" ti chung chuan kan hawn zai relin kan kir leh ta a ni.

BUAINA INTAN DAN BUL CHU -

Manipur-a tribal (Zofate/Mizote) hi ramah hian kum za tel khawsa tawh kan ni a. Kan pi leh pu ten khua lo satin rawngbawlna atana remchangah tiin khuate an lo din a. Meitei ho nen pwh buaina an nei khat hle. Mahse tun hnaiah, Biren Singh sawrkar hian keini Zofate chenna ram, tlangram hi a rawn hmu tai ta em em mai a. A bik takin Churachandpur district hi a rawn hmu tai leh zual a. Eng dang vang ni lovin, a ram a rem a, phai ruam hmun ram a awm a, tlang ram a awm bawk a. A chhunga chengte hi kan proseperous ve em avangin chhuanlam phuahchawp eng eng emaw siamin min rawn nawr ta thin a. Poppy Cultivation Kani/Drugs/War on drugs ti thin angtea sawiin chung chhuanlam an siamchawp behchhan chuan Police ten thingtlang lama in te, huante an raid ta chur chur a. Manipur Sawrkar hnuaiah project te siamin thil tha ni awma lang si lo, project an rawn siam a, thiam takin "Go to Hills" tiin Sawrkar Project an rawn siam ta a. Tichuan kar khatah vawi khat zel Imphal lama official-te keini chenna Tlangramah chuan "Go to Hills" banner hmangin an rawn kal ta thin a. Documentation a rukin an nei thin a lo ni reng a! 

Kum 2022 kum lai hawl vel atang khan Manipur sawrkar chuan a rukin survey a rawn nei ta fo a. Kan chenna ramte chu ram tha, a leilung pawh thlaiin a ngeih ziate leh a ram neitute pawh kan properous/hmuingil zia an rawn hmu ta reng a. Sawrkarah chuan report te an theh lut ta a, Sawrkar chuan an report te a han zir chiang a. Anmahni Meitei ten engtin nge dan hmangin he ram hi an chhuhsak theih ang tiin an ngaihtuah chho tan ta a. chuta an thutlukna chu eng dang nilovin, Reserve Forest/Protected Forest hmanga min nawrchhuah chu an tum ta a ni. RF/PF te chu Sawrkar chuan bawhzui char charin, land survey te an nei chho ta chur chur mai a. Khua kum za tel fe ding tawhte kha RF/PF-ah an puan hnan ta hmiah hmiah mai a. Hun reiloteah eviction, notification pawh awm mumal lovin hma an la ta hmiah hmiah mai a. Kum za tel fe keini tlangmi kan lo chen tawhnate chu chhuahsan ngaiin a lo awm ta a, a hrilhhai thlak hle a ni! 

Buai chu alo intan ta der mai a! Biren Singh hi Anti-Tribal sentiments nei lian tak niin, Imphal chhungah Sawrkar Quarter a tam zawk Tribal ho chenna chu eviction drive a nei mup mup bawk a, biak in thlengin an ti chhe ta a, boruak chhia a lo piang ta a ni. Hill Area leh Imphal Area (Valley Area) chu kan phel ta phawk mai a, meitei extremist Arambai ho chuan an Maharaja hnenah chhia an chham a, "Tlangmi/Tribal te chenna la let a, an mahni lo do lettute that turin an inralring reng a ni" tih thu te an chhuah tan ta a. Ram chu nasa takin a lo buai ta a ni e.

Credit : Vanneihthanga