Russia chuan drone hmanga Kremlin beih a nih chhanah US chu a puh
ALL IN ONE
Fri, May 5, 2023
May 4 khan Russia chuan President Vladimir Putin thah tumna, drone hmanga Kremlin beihpui thlakna hnuaiah US chu a puh a ni.
He thil thleng chhanletna atan hian Russia sipaite chuan Ukraine khawpui hrang hrang, Kiev telin attack drone hmangin an bei niin an sawi.
Putin thupuangtu Dmitry Peskov chuan finfiahna pe loin Ukraine chuan May 3 zing khan US thupek angin Kremlin chu drone hmangin a bei niin a sawi.
White House national security thupuangtu John Kirby chuan Peskov-a'n dawt a sawi a, US-in Ukraine ramri pawna bei turin a fuih lo va, a pui lo tih a sawi a, Kremlin hian eng thil nge thleng chiah tih a la hre lo a ni, a ti.
Ukraine sorkar pawhin drone hmanga Kremlin beihnaah hian inhnamhnawih a nei lo tih a sawi.
Kar hmasa khan Kremlin hi drone hmanga beih a ni a, Russia chhim lam leh Russia thununna hnuaia Crimea-a bungraw phur rel leh fuel depot-te bomb a puak nasa hle.
Russia chuan rel leh fuel depot puakah hian Ukraine chu mawhphurtuah a puh a ni.
Hetihlai hian Ukraine President, Volodymyr Zelansky chuan The Netherlands-a International Criminal Court a tlawh chuan Putin-a chu indona avanga thubuai siamsak a ngai a, chumi atan chuan Ukraine chuan court thar din tumin hma a la dawn tih a sawi.
Thu lakna: Reuters
Comments
Post a Comment