Indian Railways chuan Mizoram chhunga Myanmar ramri chu rel hmanga thlunzawm tumin hma an la mek

Indian Railways chuan Mizoram chhunga Myanmar ramri chu rel hmanga thlunzawm tumin hma an la mek

All in one

Thu, Aug 3, 2023

Act East Policy kalpui mek angin Indian Railways chuan Mizoram chhunga Myanmar ramri chu rel hmanga thlunzawm a tum thu Northeast Frontier Railway (NFR) official thuchhuah chuan a tarlang.

Thuchhuah tarlan danin, tun hnai khan Railway Board chuan Myanmar ramri bul, Mizoram chhunga km 223, Sairang (Aizawl) atanga Hbichhuah thlenga Final Location Survey (FLS) neihna tur phalna a pe a ni.

''He bial hi strategic importance leh vis-à-vis economic development ngaihtuahin Ministry of Railways chuan he project hi lak a rel a ni. He project hian Hbichhuah kaltlangin India hmarchhak lam panna kawng khat dang a pe leh dawn a ni,'' tiin thuchhuah chuan a tarlang bawk.

NFR chuan Myanmar-a Sittwe Port kaltlanga hmarchhak lama bungraw phurh man leh hun a tihhniam tur thu sawiin, ''Myanmar-a Sittwe Port hi tun hnai khan Union Minister of Ports, Shipping, and Waterways Shri Sarbananda Sonowal-a'n a hawng a ni'' tiin a sawi bawk. .

''N F Railway hian tunah hian Bairabi leh Sairang inkarah km 51.38-a thui broad-gauge railway line project a kalpui mek a, hei hi hna thawh mek a ni,'' a ti bawk.

Myanmar Border-a km 111-a sei Imphal – Moreh rel kawng connectivity project dang, final location survey pawh zawh thuai beisei a ni bawk.

Broad-gauge line thar ruahman hian India leh Myanmar leh bial zau zawk inkara sumdawnna inzawmna leh inlaichinna a tipung dawn a ni. Hmarchhak state-te sum leh pai lama hmasawnna tihpunna kawngah pawh a pui dawn a ni.